Қазақстан Республикасының Президенті Қасым-Жомарт Тоқаев үкіметтің кеңейтілген отырысында міндетті әлеуметтік медициналық сақтандыру жүйесінен нақты нәтиже жоқ екенін айтты, деп хабарлайды Qyzyljarnews.kz тілшісі.
-Міндетті әлеуметтік медициналық сақтандыру жүйесі тиімді болмады, нақты нәтиже жоқ. Үш миллионға жуық адам медициналық сақтандырудан тыс қалған. Соның кесірінен, олар денсаулық сақтау саласындағы қызметтерді толық пайдалана алмайды, — деді ел Президенті.
Сонымен қатар, мемлекет басшысы Үкімет Стратегиялық жоспарлау және реформалар агенттігімен бірлесіп, медициналық сақтандыру жүйесін жетілдіру жөнінде ұсыныстар дайындауы керек екенін атап өтті.
-Келесі өзекті мәселе – денсаулық сақтау жүйесін цифрландыру. Бұл жұмыс өте баяу жүріп жатыр. Жалпы, цифрландырудың қазіргі деңгейі дәрігерлердің жұмысын жеңілдетіп отырған жоқ,-деді Қасым-Жомарт Тоқаев.
Қасым-Жомарт Кемелұлының айтуынша, бүгінде денсаулық сақтау саласында 40-тан астам ақпараттық жүйе жұмыс істейді.
-Әр жүйенің өз кемшіліктері бар. Министрлік болса, жауапкершіліктен қашып, нақты шешім қабылдамай отыр. Ал, мұның зардабын дәрігерлер мен азаматтар тартуда. Үкімет осы мәселені тез арада шешуі керек, — деді Президент.
