Көкшетау қаласының тұрғыны СҚО мен Ақмола облысының 16 тұрғынын емтихан тапсырмай-ақ «жүргізуші куәлігін алуға болады» деп сендіріп, ақшасын қалтасына басқан, деп хабарлайды Qyzyljarnews.kz тілшісі.
Полиция департаменті баспасөз қызметінің мәліметінше, 34 жастағы алаяқ бұл заңсыз әрекеті үшін тұрғындардан ең азы 65 мың теңге сұраған.
-Зардап шеккендердің бірі күдіктімен интернетте автокөлік сату туралы хабарландыру бойынша байланысқа шыққан. Сөз арасында айлакер «емтихан тапсырмай, жүргізуші куәлігін алып бере алатынын» айтыпты. Бұған ауыл тұрғыны келісіп, таныстарына нөмірін таратқан. Осылайша, сан соғып қалғандардың қатары көбейді, — деді аудандық ПБ бастығы Нұрлыжан Ақтанов.
Алайда, уәде етілген құжаттардың бірін де жасамаған. Жедел-іздестіру іс-шарасы нәтижесінде аудан полицейлері 34 жастағы Көкшетау қаласының тұрғынын ұстады. Қазіргі уақытта ол тергеу изоляторында қамауда. Қазақстан Республикасы Қылмыстық кодексінің 190-бабы 3-бөлігі «Алаяқтық» бойынша сотқа дейінгі тергеп-тексеру жүргізілуде. Бүгінгі таңда күдіктінің 1 адамды алдағаны анықталды.
