Петропавл қаласының 20 жастағы тұрғыны есірткі тасымалымен айналысқаны үшін 10 жылға сотталды. Қалалықтан 397,62 грамм «тұз» деген атаумен белгілі «альфа-PVP» синтетикалық есірткісі тәркіленді, деп хабарлайды Qyzyljarnews.kz тілшісі.
Есірткі қылмысына қатысы бар жігітті СҚО ПД есірткі қылмысына қарсы іс-қимыл басқармасының қызметкерлері ақпан айында ұстаған. Одан 397,62 грамм «альфа-PVP» синтетикалық есірткісі тәркіленді. Полицейлер қылмыскердің үйінен электронды таразы мен қаптайтын материалдар тапқан. Ұсталған адам мұндай қылмыспен Петропавлда ғана емес, Қостанай облысының Рудный қаласында да айналысқан.
— Мұндай әрекеттер Қазақстан Республикасы Қылмыстық кодексінің 297-бабы 4-бөлігі «Есірткі, психотроптық заттарды, сол тектестерді өткізу мақсатында заңсыз дайындау, қайта өңдеу, иемдену, сақтау, тасымалдау, жөнелту не өткізу» бойынша қылмыстың аса ауыр санатына жататынын ескертеміз. 10 жылдан 15 жылға дейiн бас бостандығынан айыру көзделген, — дейді облыстық есірткі қылмысына қарсы іс-қимыл басқармасының басшысы Жандос Басыбаев.
