2 апта ішінде солтүстікқазақстандық полицейлер тіркелмеген 20 қаруды тәркіледі, деп хабарлайды Qyzyljarnews.kz тілшісі.
Қызылжар ауданының 37 жастағы тұрғыны, 3 баланың әкесі мылтықты моншасының кіреберісінде сақтаған. Бұл фактіні үй-үйді аралау кезінде учаскелік полиция инспекторы анықтаған. Ауыл тұрғынының айтуынша, ол қаруды өткен жазда шөп шауып жүрген кезінде тауып алыпты. 16 калибрлі аңшы мылтығы алынып, сараптамаға жіберіді. Қару иесіне қатысты Қазақстан Республикасы Әкімшілік құқық бұзушылық туралы кодексінің 482-бабы бойынша материал жинастырылды.
-Заң бойынша оған 20 айлық есептік көрсеткіш көлемінде айыппұл салу көзделген. Сондықтан, заңсыз қару-жарақ сақтап жүрген азаматтар өз еріктерімен мылтықтарын тапсырса, жауапкершілікке тартылмайтынын еске салғымыз келеді, — деді СҚО ПД әкімшілік полиция басқармасының бастығы Серік Әлжанов.
Облыс аумағындада жуырда өткізілген «Қару» акциясының екі аптасында 17 тегіс ұңғылы қару, 1 иір ойықты, 1 газды және 1 травматикалық қару тәркіленді.
