СҚО-дағы бұрынғы уран кен орындары қазір жергілікті атқарушы органдардың қарауында. Аумақтарды иесіз деп тану және ауылдық округтердің әкімдіктеріне беру оларды тиісті түрде қоршауға алып, тиісті белгілер орнатуға мүмкіндік берді, деп хабарлайды Qyzyljarnews.kz тілшісі.
Өңірде 2000 жылдардың басынан бері иесіз қалған консервацияланған 6 уран кеніші бар. Олар: Айыртау ауданындағы «Грачевское», «Косачинное» және «Дергачевское», «Шоқпақ», «Ақан-Бұрлық» кеніштері және Ғ. Мүсірепов ауданы Тоқсан би ауылы маңындағы атауы жоқ кеніш.
Экологтар бұрынғы шахталардағы гамма-сәулелену деңгейін үнемі өлшеп отырды және ықтимал қауіпті аумақты жабу керектігін айтты. Өткен жылы бұрынғы кен орындары ауылдық округ әкімдіктерінің балансына берілді.
— Қоршаулар, радиациялық қауіпсіздік белгілері орнатылды. Енді жергілікті атқарушы органдар радиациялық аумақта үнемі мониторинг жүргізетін болады, — деді облыстық экология департаментінің басшысы Азамат Бектасов.
