Қайғылы оқиға 4 тамыз күні түстен кейін болған. Жас жігіт достарымен бірге жағадан шамамен сегіз метр қашықтықта катамаранға мініп серуендеген, деп хабарлайды Qyzyljarnews.kz тілшісі.
Куәгерлердің айтуынша, жігіттер құтқару кеудешелерін кимеген.
— Ол жердегі судың тереңдігі шамамен 2,5-3 метр. Суға кеткен жігіт батып бара жатқандығы туралы ешқандай белгі бермеген. Алдымен оны өзімен бірге жүрген достары, кейін құтқарушылар судан аман алып шығуға тырысқан. Пирс оқиға болған жерден 100-150 метр қашықтықта орналасқан. Шомылуға тыйым салынған қамысты жер. Құтқарушылар суға сүңгіп, алып шыққан кейін, дем салып құтқармақ болды, өкінішке қарай қолдан келер қайран болмады, — деді СҚО ТЖД азаматтық қорғаныс басқармасының бастығы Марат Мұратов.
Жыл басынан бері өңірде 5 адам суға кетті, оның 1-і бала. Барлық жағдайлар жабдықталмаған жерлерде тіркелген.
