СҚО-да оқу орындарының терроризмге қарсы қорғалуы тексерілді, деп хабарлайды Qyzyljarnews.kz тілшісі.
Жаңа оқу жылы қарсаңында СҚО полицейлері мектептер мен колледждермен күшейтілген жұмыс жүргізуде. Экстремизмге қарсы іс-қимыл басқармасының қызметкерлері орта, арнаулы орта және жоғары білім беру мекемелерінің терроризмге қарсы қорғалуын тексеруде. Облыста олардың саны 276.
Басты назарға бейнебақылау жүйелері, «дабыл түймелері», сондай-ақ күзет және өрт сигнализациясы жабдықтары алынып, оқытушылар құрамы мен техникалық персоналдың террористік сипаттағы қауіп-қатер кезіндегі бастапқы іс-қимылдар туралы теориялық білімдері тексерілді. Бұдан кейін полиция мұғалімдерге дағдарыс жағдайындағы әрекеттер бойынша әдістемелік нұсқаулар берді. Жарылғыш құрылғыларға ұқсас заттар табылып, терроризм актісі туралы қоңырау түскен кезде полиция оқиға орнына дереу келетінін жеткізді.
— Оқушылардың қауіпсіздігі бойынша сабақтар оқу кезеңі бойы тұрақты негізде өткізіледі. Экстремизмге қарсы іс-қимыл бағыты бойынша сабақтар барысында қауіпсіз мінез-құлық дағдыларын қалыптастыруға, экстремистік ағымдарды насихаттау алдында тұрақтылықты дамытуға баса назар аударылады. Өскелең ұрпақтың қорғалуы-полиция жұмысының басты басымдықтарының бірі, — дейді СҚО ПД экстремизмге қарсы іс-қимыл басқармасы бастығының міндетін атқарушы Алмас Шытқанов.
