СҚО әкімі Құмар Ақсақалов әлеуметтік желідегі парақшасында жыл соңына дейін өңірде 6 мың жас жұмысқа орналасатынын жазды, деп хабарлайды Qyzyljarnews.kz тілшісі.
Облыс әкімінің айтуынша, Еңбек және халықты әлеуметтік қорғау министрі Тамара Дүйсеновамен кездесуде солтүстікқазақстандықтардың табысын арттыру және жұмыспен қамту мәселесі талқыланды.
— Биыл 13 мың жұмыс орнын құруды жоспарлап отырмыз. Қазірдің өзінде 11 мың жұмыс орнын аштық, оның 72 % – тұрақты жұмыс орындары. Жастарды жұмысқа орналастыру «Алғашқы жұмыс орны», «Жастар практикасы» және «Ұрпақтар келісімшарты» жобалары бойынша жүзеге асырылады. Жыл басынан бері 3,5 мыңнан астам жас жұмысқа орналастырылса, жыл соңына дейін Кәсіпкерлікті дамытудың ұлттық жобасы бойынша 6 мың адам жұмысқа орналасады. Қаржыландыру төрт есе яғни, 1,4-тен 6 миллиард теңгеге дейін ұлғайды, — деп хабарлады Құмар Ақсақалов.
