Петропавлда ақпан айында құлаған қалалық мәдениет үйінің шатыры жөнделуде, деп хабарлайды Qyzyljarnews.kz тілшісі.
Мәдениет үйінің шатырын жөндеу жұмыстары басталғаны туралы жақында тағайындалған Петропавл қаласының әкімі Руслан Аңбаев өзінің әлеуметтік желідегі парақшасында хабарлады. Оның айтуынша, ескі шатыр бөлшектелгеннен кейін негізгі құрылыс жұмыстары басталады. Олар осы жылдың 1 желтоқсанына дейін аяқталады деп күтілуде. Құрылыс жұмыстарын мердігер жергілікті «Доломит» ЖШС компаниясы жүргізеді.
Көрермендер залының үстіндегі төбелер мен тірек арқалықтар биыл ақпан айында құлады. Мәдениет басқармасы мамандарының айтуынша, техникалық тексеру кезінде концерт залының үстіндегі шатырдың апатты жағдайы туралы қорытынды осыдан 1 жыл бұрын берілген екен. Шатыр құлағаннан кейін мемлекеттік органдар күрделі жөндеу жүргізу үшін қаражат бөлу туралы мәслихаттың кезекті сессиясына өтініш берді.
Абырой болғанда, оқыс оқиғадан ешкім зардап шеккен жоқ. Мәдениет үйінде жұмыс істеген барлық 27 шығармашылық ұжым дайындық жұмыстарын жалғастыру үшін басқа ғимараттарды жалға алған.
