Петропавлда мас жүргізуші жолаушы тасымалдаған, деп хабарлайды Qyzyljarnews.kz тілшісі.
11 тамыз күні таңертең Петропавл қаласы ПБ патрульдік полиция қызметкерлері Абай көшесінде 30 жастағы қала тұрғынының басқаруындағы Lada-2170 автокөлігін тоқтатты. Тексеріс барысында автокөліктің салонында төрт жолаушы болғаны анықталып, мас жүргізуші олардың өмірі мен денсаулығына қауіп төндіргені расталды.
Аталған іске байланысты Қазақстан Республикасының Әкімшілік құқық бұзушылық туралы кодексінің 608-бабы бойынша материалдар жиналды. Қазіргі уақытта ұсталған адам әкімшілік қамауға алынып, көлік басқару құқығынан жеті жылға айырылды.
– 19 тамызда басталған акция барысында облыс орталығында мас күйінде 27 жүргізуші ұсталды. Алкогольді ішімдік ішкеннен кейін рөлге отыратын кейбір жүргізушілердің өзіне деген сенімділігі қайғылы жағдайға душар етуі мүмкін. Барлық автокөлік жүргізушілерін жолда жүру ережелерін қатаң сақтауға шақырамыз, — дейді Петропавл қаласы ПБ жергілікті полиция қызметі бөлімінің бастығы Рүстем Садулов.
