Солтүстік Қазақстан облысында криминалистердің көмегімен биыл 200-ге жуық қылмыс ашылды, деп хабарлайды Qyzyljarnews.kz тілшісі.
СҚО полиция департаменті баспасөз қызметінің мәліметінше, жыл басынан бері осы сала мамандары 1426 рет оқиға орнына шығып, 3 мыңға жуық қол және 500-ден астам трасологиялық, яғни аяқ киім, көлік құралы, бұзу және тағы басқа құралдардың іздерін алды. Сонымен қатар, 157 биологиялық із, 92 иіс және 123 микробөлшек алған. Бұдан басқа, аумақ бөліністерінің тапсырмалары бойынша зерттеулер жүргізеді. Айта кететіні, әр алынған оқ-қару криминалистердің зерттеуіне түседі.
-Криминалистер жұмысының маңызды бөлігі оқиға орнынан айғақ заттарды жинаудан және зерттеуден тұрады. Кей кездері белгілі бір қиыншылықтар туындап жатады. Мәселен тиісті жағдайда сақталмаған ескі қаруды атып көру барысында үлгі жарылмас үшін қосымша қауіпсіздік шараларын қолданып, қашықтықтан атуға тура келеді. Зерттеуге ұсынылған үлгілердің қандай атыс қаруына жататыны анықталып, атуға жарамдылығы, маркасы, калибрі, серия нөмірі белгіленеді, кейін Қазақстан Республикасы ІІМ криминалдық есептері бойынша тексеріледі, — дейді СҚО ПД жедел-криминалистикалық басқармасы бастығының орынбасары Евгений Богачев.
Жыл басынан облыс криминалистері 2,1 мыңнан астам түрлі зерттеулер жүргізді. Әдетте бұл мамандардың жұмыстарының нәтижесі сотқа дейінгі тергеу барысында маңызды роль атқарады, күдіктінің іске қатысын растайды не теріске шығарады.
