Петропавлдағы тұрғын үйдің бір шаршы метрінің орташа құны 317,5 мың теңгені құрайды. Бұл өткен жылдың көрсеткішінен 14% — ға артық, деп хабарлайды Qyzyljarnews.kz тілшісі.
Инвестициялық форумда облыс әкімінің орынбасары Сәтжан Аблалиев тұрғын үй бағасы мен салынып жатқан үйлер туралы мәліметтерді келтірді. Оның айтуынша, ауылдан қалаға қоныс аударушылар көбейді. 2019 жылдан бастап Петропавлға жеті мыңнан астам адам көшіп келген.
— Қала халқы санының артуы жаңа тұрғын үй салу қажеттілігін туындатады. Кезекте 20 мыңнан астам азамат тұр, олардың 15 мыңы Петропавлда. Облыс бойынша «Отбасы банкі» салымшыларының саны 51 мың адамнан асады. Екі жыл ішінде «Нұрлы жер» мемлекеттік бағдарламасы бойынша мыңнан астам пәтер сатылды, — деп хабарлады Сәтжан Аблалиев.
Жыл соңына дейін 46 көпқабатты тұрғын үй пайдалануға беріледі. Оның 22 – сі бюджет қаражаты есебінен салынса, қалғаны-коммерциялық тұрғын үйлер.
