СҚО полицейлері аграрийлерге астық жинау науқаны кезеңінде өз мүліктерін қорғауға көмектесуде, деп хабарлайды Qyzyljarnews.kz тілшісі.
20 тамыздан бастап СҚО полицейлері «Астық» жедел-профилактикалық іс-шарасы режімінде жұмыс істеуде. Оның мақсаты – астық жинау науқаны кезеңінде астық өнімдерін, жанар-жағармай, гербицид мен ауыл шаруашылық техникасының қосалқы бөлшектерін ұрлау фактілерін анықтау мен жолын кесу. Осыған орай криминалдық полицияның тәжірибелі қызметкерлері, учаскелік инспекторлар, патрульдік полицейлерден құралған мобильді топ жұмыс істейді.
Олардың қадағалауына алқаптар, элеваторларды маңы, қырмандар мен ауыл шаруашылығы нысандары алынды. Бүгінде облысымызда аталған объектілердің саны 100-ден асады. Тәжірибе көрсеткендей, астық жинау науқаны кезінде ұрлық көбейеді.
— Көбіне маусымдық жұмыс кезінде кәсіпорын жұмысшылары жиі ұрлыққа барады. Аталған саладағы қылмыстардың талдауы тиімді қарсы іс-қимыл жүйесін құруға мүмкіндік береді. Жедел-профилактикалық жұмыстар шеңберінде жеке құрам ауыл шаруашылығы өнімін өндірушілерге көмек көрсетуге, кәсіпорындардың басшылығымен және күзетімен тығыз байланыс жасауға бағдарланды, -дейді СҚО ПД криминалдық полиция басқармасы бастығының міндетін атқарушы Мадияр Харипов.
Іс-шара 10 қазанға дейін жалғасатынын айта кеткен жөн.
Фото: СҚО ПД Баспасөз қызметі
