Солтүстік Қазақстан облысында биыл шетелдің азаматы бола тұра Қазақстан төлқұжатымен жүрген 94 адам анықталып, әкімшілік жауапкершілікке тартылды, деп хабарлайды Qyzyljarnews.kz тілшісі.
СҚО аумағында «қос азаматтықпен» жүргендердің қатары көбейген. Көші-қон қызметі басқармасы бастығының міндетін атқарушы Ермек Нүсірбаевтың айтуынша, былтырғы жылдың 8 айында екі елдің төлқұжатымен жүрген 85 адам анықталса, биыл ұқсас кезеңде заңды бұзған 94 шетелдік анықталып отыр. Яғни 11 % -ға артқан. Олардың екеуі ел аумағынан шығарылса, 92 адам әкімшілік жауапкершілікке тартылды.
-Ақпан айында еліміздің бұрынғы азаматшасы мемлекеттік шекарадан өткен кезде Қазақстан Республикасы құжаттарын және төлқұжатын көрсеткен. Шекарашылар бұл фактіні тіркеп, материалды көші-қон қызметіне жіберді. Кейін іс сотқа жіберіліп, нәтижесінде әйелге 200 АЕК мөлшерінде – 612 мың 600 теңге көлемінде айыппұл салынды, — дейді Ермек Нүсірбаев.
Маманның айтуынша, «қос азаматтық» үшін елімізде әкімшілік жауапкершілік қарастырылған. Қазақстан құжаттарын заңсыз қолданғандар елден депортацияланады немесе 300 АЕК мөлшерінде айыппұл төлейді.
