СҚО-да 2026 жылға дейін 52 ферма салынады. Бұл туралы республикалық малшаруашылығы слетінде аймақ басшысы Құмар Ақсақалов мәлімдеді, деп хабарлайды Qyzyljarnews.kz тілшісі.
Қазір облыста 22 заманауи ферма жұмыс істеп тұр. Ал олардың барлығы соңғы төрт жылда салынғанын айта кеткен жөн.
— 2026 жылға дейін барлығы 52 ферма салу жоспарланған. Біз сүт өндіру көлемін 1 млн. тоннаға дейін жеткізуді мақсат етіп отырмыз. Биыл 12 мың сиырға арналған қуаты 58 мың тоннадан асатын 17 заманауи сүт -тауар кешені салынуда. Олардың сегізі жыл соңына дейін іске қосылады, — деді СҚО әкімі.
Облыс әкімінің айтуынша, фермалар ауылдарға жақын болғандықтан, бір кешенде 35-60 жергілікті тұрғын жұмыс істейді.
— 600 басқа арналған бір ферма 10 мың адамды сүтпен қамтамасыз ете алады. Соңғы үш жылда ұйымдастырылған шаруашылықтарда сүт өндіру 26% — ға өсті. Бұл сүт зауыттарын сапалы шикізатпен қамтамасыз етуге мүмкіндік береді. Өңір еліміз бойынша барлық сүт өнімдерінің төрттен бір бөлігін өндіреді, — дейді Құмар Ақсақалов.
