Петропавл қаласының орталық алаңында 1 курс курсанттарының әскери ант қабылдау рәсімі өтті. Академияға түскен 175 болашақ офицер Отанға адал болуға салтанатты түрде ант берді, деп хабарлайды Qyzyljarnews.kz тілшісі.
Курсанттарды әскери ант қабылдауға арналған салтанатты іс-шараға өңірдің күш құрылымдарының бірінші басшылары, ардагерлер, болашақ офицерлердің ата-аналары мен туыстары қатысты.
-Курсант мырзалар, әрқашан естеріңізде болсын, сіздер Ұлттық ұлан академиясында білім ала отырып, біздің мемлекетіміздің қорғаушысы болып табыласыздар. Сіздердің әрқайсыларыңыздың лайықты білім алып, кейіннен алған дағдыларыңызды іс жүзінде жүзеге асырып, мемлекетіміздің қорғаныс қабілетін нығайтуға зор үлес қосатындарыңызға сенім білдіремін,- деді Ұлттық ұлан академиясының бастығы полковник Артур Токушев өзінің құттықтау сөзінде.
Қазіргі уақытта Академия базасында жеті мамандық бойынша офицерлерді даярлау жүзеге асырылуда. Курсанттарды оқыту сегіз кафедрада жүргізіледі. Академияда жоғары оқу орнынан кейінгі және қосымша білім беру факультеті жұмыс істейді, онда жыл сайын Ұлттық ұланның және ішкі істер органдарының офицерлері мен келісімшарт бойынша әскери қызметшілері мамандықтары бойынша қайта даярлаудан өтеді.
Мұнда ғылыми және ғылыми-педагогикалық кадрларды даярлауға көп көңіл бөлінеді. Жыл сайын оқытушылар қатары магистратура және докторантура бағдарламалары бойынша жоғары оқу орындарының түлектерімен толықтырылады.
