СҚО полицейлері «Трамадол» сату фактісін анықтады, деп хабарлайды Qyzyljarnews.kz тілшісі
5 қыркүйектен бастап СҚО полицейлері «Дәрмек» жедел-профилактикалық іс-шарасын өткізуде. Оның аясында есірткі қылмысына қарсы күрес күшейеді.Жедел-профилактикалық іс-шараның алғашқы күні Петропавлда таратылуы шектелген «Трамадол» дәрілік препаратын заңсыз сату фактісі анықталды. Аталған препаратты бұрын істі болған есірткіге тәуелді 34 жастағы әйел сатып келген. Оның үйінен тиым салынған дәрінің 160 таблеткасы мен 57 капсуласы алынды.
– Аталған дәріні ол медициналық мекемелердің бірінде жұмыс істейтін дәрігерден алғаны анықталды, ал ол дәрілерді емделушінің рецептісі бойынша алғаны белгілі болды. Бұл фактілер бойынша материалдар Қазақстан Республикасы Әкімшілік құқық бұзушылық туралы кодексінің 424-бабы «Заңсыз медициналық және (немесе) фармацевтикалық қызмет» бойынша әкімшілік сотқа тапсырылды, -дейді СҚО Полиция департаменті Есірткі қылмысына қарсы іс-қимыл басқармасы бастығының міндетін атқарушы Иван Терзиди.
Айта кету керек, «Дәрмек» жедел-профилактикалық іс-шарасы 9 қыркүйекке дейін жалғасады.
Фото: СҚО ПД баспасөз қызметі
