Петропавлдың 23 жастағы тұрғыны алдағы он жылын қауіпсіздігі жоғары режімдегі колонияда өткізеді, деп хабарлайды Qyzyljarnews.kz тілшісі.
Солтүстік Қазақстан облысы полиция департаменті баспасөз қызметінің мәліметінше, бір жыл бұрын Петропавл тұрғынының есірткі таратуға қатысы болуы мүмкін деген ақпарат түскен. Жедел-іздестіру іс-шаралары барысында бұл мәлімет расталды.Жігіттің тұрғылықты жерінен қауіпті заттардың түр-түрі, соның ішінде 30 грамнан астам мефедрон мен a-PVP синтетикалық есірткісі табылды.
Ол көрсеткен «жасырын» орындардан полицейлер MDMA таблеткаларын немесе «экстази» атауымен белгілі метамфетаминді тәркіледі.Ұсталған азамат тергеу кезінде және сотта өзінің кінәсін мойындамай, есірткіні жеке пайдалану мақсатында сақтағанына сендірмекші болды. Өзінің айтуынша, ол есірткі жарнамалайтын сайтты бұзып, біреулердің жасырын жерге тастап кеткен нашаны алған. Алайда, нақты дәлел келтіре алмады.
– Қазақстан Республикасы Қылмыстық кодексі 297-бабы 3-бөлігіне сай есірткі сатушы 10 жылға бас бостандығынан айырылды. Соңғы жылдары жастар оңай ақша таппақшы болып, заңды бұзады. Жыл басынан облыста есірткі сатуға қатысты 16 үкім шығарылды, оның 9-ы – 19 бен 25 аралығындағы жастар, — дейді СҚО Полиция департаменті Есірткі қылмысына қарсы іс-қимыл басқармасы бастығының міндетін атқарушы Иван Терзиди.
