Облыс аумағында лейкоз, туберкулез, сібір жарасы мен бруцеллез және өзге де мал ауруларына қарсы қан алу және екпе салу жұмыстары жүріп жатыр, деп хабарлайды Qyzyljarnews.kz тілшісі.
Малдың ауруын анықтау үшін әуелі қан алынып, оның нәтижесі 3 күннен кейін белгілі болады. Сараптама қорытындысы ойдағыдай болса, вакцина қойылады. Белгілі бір кесел түрі анықталса мал қасапханаға жіберіледі. Төрт түліктен бөлек, құсқа да қанаттылардың тұмауына қарсы иммундау шарасы жүріп жатыр.
– Биылғы жылы 40 мыңнан астам ірі қара мал, 30 мыңға жуық қой мен ешкі, 10 мың жылқы, 24 мың шошқа, 135 мың құсқа екпе егу жұмыстары жүргізіледі. Иммундауға ветеринарлық станцияның 37 мал дәрігері қатысады. Аталған жұмыстар ауданымыздың 69 елді мекенінде, 47 шаруа және фермер қожалықтарында жүргізіп жатыр, — дейді Қызылжар ауданының ветеринарлық станциясының директоры Ербол Багенов.
Жалпы облыс бойынша биыл 1 жарым млн.-нан астам жануарға екпе қойылу жоспарланып отыр. Малға арналған күзгі екпе жұмыстары қазан айының соңында аяқталады.
