СҚО бойынша Ұлттық статистика бюросы департаменті өңір тұрғындарының ай сайынғы ақшалай шығындарын есептеді, деп хабарлайды Qyzyljarnews.kz тілшісі.
Статистикаға сүйенсек, екінші тоқсанда жан басына шаққандағы ай сайынғы шығындар 84 мың теңгені құрады. Бұл өткен жылмен салыстырғанда 10% — ға жоғары. Солтүстікқазақстандықтардың ақшалай шығыстарының құрамында ең үлкен үлесі яғни, 89 %-ын тұтыну тауарлары алады. Ал ақшалай шығындардың 10% — дан астамын материалдық көмек, алимент, несие мен қарызды өтеу, салықтар құрайды.
Отбасылық бюджеттің ең көп шығыны яғни 45% азық — түлік тауарларына тиесілі. Азық — түлік емес тауарлар тобында киім мен аяқ киім сатып алу жетекші орын алады. Бұл шығындардың бестен бір бөлігі. Ақылы қызметтердегі шығыстардың үштен бірі тұрғын үй-коммуналдық қызметтерге, тұрғын үйді ұстауға және жөндеуге, көлік және байланыс қызметтеріне жатады. Аз бөлігін мәдени іс-шараларға және бос уақытты ұйымдастыруға шығындар алады. Қала тұрғындарының ақылы қызметтеріне жұмсалатын шығындар ауыл тұрғындарының шығындарынан екі есе асып түсті.
