СҚО-да жыл басынан бері 20,7 мыңнан астам адам жұмысқа орналастырылып, 9 мыңға жуық жаңа тұрақты жұмыс орны құрылды. Мұндай мәліметтерді әкімдік отырысында экономика басқармасының басшысы Қуанышбек Қалижанов айтты, деп хабарлайды Qyzyljarnews.kz тілшісі.
Оның айтуынша, жұмыс орындарының ең көбі, шамамен 40% — ауыл шаруашылығына, 25% — жеке кәсіпкерлікке, 7% — құрылыс және 5% — өнеркәсіпке тиесілі.
— Жұмысқа орналастыру жоспары 102,7% — ға, жаңа тұрақты жұмыс орындарын құру жоспары 103% — ға орындалды. Кәсіпкерлікті дамытудың ұлттық жобасының іс-шараларының нәтижесінде 11,9 мың адам жұмыспен қамтылды. Жалпы, халықты жұмыспен қамту бойынша қабылданып жатқан шаралар жұмыссыздық деңгейінің өсуінің тежеуші факторы болып табылады, — деді Қуанышбек Қалижанов.
