Петропавлда 30 хоккей кортының 10-ы қыста жұмыс істемейді, деп хабарлайды Qyzyljarnews.kz тілшісі.
Қалалық мәдениет, тілдерді дамыту, дене шынықтыру және спорт бөлімінің басшысы Әлия Бейсенованың айтуынша, бүгінгі таңда Петропавлда 30 хоккей корты болса, оның төртеуі жабық.
— Қыс мезгілінде тек 20 хоккей кортын іске қосуды жоспарлап отырмыз. 10 корт пәтер иелері кооперативі төрағалары мен үй тұрғындарының өтініші бойынша істемейтін болды. Оған көктемде қар еріген кезде тұрғын үйлердің жертөлелерін су басу қаупі туындауы себеп болып отыр, — деді Әлия Бейсенова.
Қыста бес шаңғы трассасы дайындалып, шаңғы мен конькиді жалға беретін 4 орын жұмыс істейтінін айтты. Қала билігі петропавлдықтар арасында «шаңғышылар күнін», оқушылар, студенттер, өндірістік ұжымдар, медицина қызметкерлері мен әкімдік қызметкерлері арасында жарыстар өткізуге ниетті екенін мәлімдеді.
