Петропавлда жұмысшы мамандықтарына оқыту бойынша қысқа мерзімді курстар өткізіледі, деп хабарлайды Qyzyljarnews.kz тілшісі.
Халықпен кездесуде қала әкімі Руслан Аңбаевтың айтуынша, нарықта электр және газбен дәнекерлеушілер, электриктер, ағаш ұсталары, слесарь-сантехниктер, кондитерлер, аспаздар, тігіншілер сұранысқа ие. Ол халықты жұмыспен қамту орталығы аталған мамандықтар бойынша курстардан өтуге ниет білдірушілерді одан әрі жұмысқа қабылдайтынын айтты.
— Жыл басынан бері Петропавлда 2 279 жаңа жұмыс орны ашылды. 5 287 адамды түрлі бағдарламаларға тартып, 4 177-сі тұрақты жұмыс орындарына орналастырылды. Business.enbek.kz порталында кәсіпкерлікті дамыту жөніндегі 2021-2025 жылдарға арналған ұлттық жоба шеңберінде бизнес-идеяларды іске асыру үшін мемлекеттік гранттар алуға өтінімдерді қабылдау басталды. Үміткерде үш жылдан аспайтын мерзіммен «Бастау Бизнес» жобасы бойынша кәсіпкерлік негіздеріне оқыту туралы сертификат болуы тиіс, — деді Руслан Аңбаев.
Қала әкімінің айтуынша бүгінде грант берудің барлық процесі электронды форматқа ауыстырылды. Биыл 188,2 млн. теңге сомасына 148 мемлекеттік грант беру жоспарлануда. Көлемі екі есеге — 400 АЕК-ке дейін немесе 1,2 млн. теңгеден астам ұлғайтылды. 37 адам 45 млн. теңгеге грант алды.
— Жастар мен зейнет жасына дейінгі адамдарға арналған жобалар іске асырылуда. Түлектер мен жұмысшы жастар үшін «Жастар практикасы» және «бірінші жұмыс орны», зейнеткерлік жасқа дейінгі адамдар үшін — «Күміс жас» жобасы жұмыс істеп тұр. Жалпы, қабылданып жатқан шаралар жұмыссыздық деңгейін 4,4% деңгейінде ұстап тұруға мүмкіндік берді, — деді Руслан Аңбаев.
