Бағдат Мусин мемлекеттік ақпараттық ресурстарға жасалатын кибершабуылдардың Қазақстан Республикасы Цифрлық даму, инновациялар және аэроғарыш өнеркәсібі министрлігіне қатысы жоғын айтты, деп хабарлайды Qyzyljarnews.kz тілшісі.
Бағдат Мусин бұл сала бойынша өзі басқаратын министрлік тек заң мен стандарттар жазатынын, ал кибершабуыл мен қорғанысқа арналған арнайы мемлекеттік ұйым бар екенін жеткізді.
– Ол – Мемлекеттік техникалық қызмет. Біз жалпы заң талаптарын және басқа да талаптарды бекітеміз, олар сол бойынша жұмыс істейді. Қазір елдегі интернет жүйелеріне салмақ түсті, оның жылдамдығы баяулады. Мемлекеттік техникалық қызмет әрі қарай жұмысын жалғастыруда,- деді министр.
Сондай-ақ Мусин ақпараттық қауіпсіздік – күрделі мәселелердің біріне айналғанын атап өтті.
– Дүниежүзінде түрлі мемлекеттік ұйымдар күн сайын кибершабуылдарға тойтарыс береді. Жаңа интернет дәуірі келді. Интернет экономикаға жаңа тәсілдер, жаңа мүмкіндіктер береді, сонымен қатар қауіпсіздік жағынан да жетілдіруді қажет етеді,- деді ол.
Еске салайық, кейінгі күндері мемлекеттік органдардың интернет ресурстарына толассыз кибершабуыл жасалып жатыр.
