Amanat партиясының төрағасы Ерлан Қошанов партия съезінде елдегі кезектен тыс президент сайлауына Қасым-Жомарт Тоқаевтың кандидатурасын ұсыну үшін халықтық коалиция құрылғанын мәлімдеді, деп хабарлайды Qyzyljarnews.kz тілшісі.
Ерлан Қошанов бұл шешімнің маңызына тоқталып, Қасым-Жомарт Тоқаевтың кандидатурасын ұсынатын басқа да партиялар, саяси бірлестіктер бар екенін атап өтті.
– Біз осы саяси бірлестіктермен бірігіп, Тоқаевты қолдайтын халықтық коалиция құру туралы келісімге келдік. Түскі астан кейін мемлекет басшысының қатысуымен үлкен форум өтеді, барлығымыз қатысамыз, — дейді Ерлан Қошанов.
Amanat партиясының 24-съезі алаңында Қазақстан Республикасы Әділет министрі Қанат Мусин қоғамдық бірлестіктердің бір кандидатты ұсынуына заңда тыйым салынбағанын айтты. 6 қазанда Amanat партиясы мен Қазақстан халықтық партиясы президенттікке Қасым-Жомарт Тоқаевтың кандидатурасын ұсынды.
Қазақстанда кезектен тыс президент сайлауы 20 қарашаға белгіленген.
