Жыл басынан Петропавл полицейлері 63 адамды маскүнемдіктен мәжбүрлеп емделуге жіберді, деп хабарлайды Qyzyljarnews.kz тілшісі.
9 айдың ішінде Петропавлда ащы суды бірлесе ішу барысында 22 адам ауыр дене жарақаттарын алған. Тәртіп сақшылары спирттік ішімдікті асыра ішу – қылмыстардың жасалуына түрткі болатын факторлардың бірі екенін айтады. Жалпы жыл басынан Петропавлда алкогольдік масаң күйде жасалған 190 қылмыс тіркелген.
Бұдан бөлек, отбасылық жанжалдардың басым бөлігі ащы судың кесірінен орын алады. Қаңтар айынан облыс орталығында бұндай 957 жанжал тіркеліп, қала көшелерінде 206 мас жүргізуші ұсталды. Учаскелік полиция инспекторлары қылмыстың алдын алу бойынша қабылдап жатқан шаралардың арасында алкогольге қарсы заңнаманы сақтау, ащы суға тәуелді адамдарды мәжбүрлеп емделуге жіберу шарасы да бар.
– Алдымен маскүнемнің жақындарына емханаға өтініш жазу керек. Адамдар маскүнемнің түзелем деген уәделеріне сеніп, біразға дейін осы қадамға бармайтын көрінеді. Учаскелік инспекторлар маскүнемнің туыстарына ішімдікке тәуелдіні емге жіберу рәсімін түсіндіріп, медицина қызметкерлеріне көмек көрсетуде. Жыл басынан Петропавлдан мәжбүрлеп емделуге 63 адам жіберілді, – дейді Петропавл қаласы ПБ ЖПҚ бөлімі бастығының орынбасары Айдын Ахмағамбетов.
Бұдан басқа, облыс орталығының полицейлері спиртті заңсыз сатқаны үшін 65 адамды, алкогольді түнгі уақытта, лицензиясыз, кәмелетке толмағандарға сатқаны үшін 27 дүкен иесін жауапкершілікке тартты. Спирттік ішімдікті ішкені немесе қоғамдық орында масаң күйде жүргені үшін 3700 адам жауапкершілікке тартылды. Заңсыз айналымнан 15 мың литрден астам алкоголь алынды.
