Сарапшылардың 10 қарашада жариялаған есебінде бір жыл ішінде Қазақстандағы жолаушылар пойызының қызметі 20 пайыз қымбаттағаны анықталды, деп хабарлайды Qyzyljarnews.kz тілшісі.
Energyprom.kz басылымында сарапшылар қала маңында қатынайтын пойыздардың жүру ақысы 16,7% қымбаттағанын айтты. Республикаішілік қатынас пойызының екінші класты вагонында тасымалдау 20,6%, купе вагонында 17,8% қымбаттады.
Баға Шымкент, Жетісу және Алматы облыстарында айтарлықтай өскен. Ал Ақтөбе, Батыс Қазақстан, Ұлытау және Павлодар облыстарында баға аса көп өсе қоймағаны байқалды. Небәрі 9 айда, зерттеушілердің мәліметінше, 14,7 миллион жолаушы теміржол көлігі қызметін пайдаланған. Бұл бір жыл бұрынғы көрсеткіштен 32,6 пайыз артық.
Бір қызығы, пойыз қызметін көбіне елорда тұрғындары пайдаланған. Көліктің бұл түрін Батыс Қазақстан облысының тұрғындары сирек пайдаланады екен.
