10 ай ішінде әлеуметтік медициналық сақтандыру қорының облыстық филиалына медициналық мекемелердің жұмысына байланысты 278 өтініш – шағым түскен, деп хабарлайды Qyzyljarnews.kz тілшісі.
Филиал директоры Лариса Гордеева брифингте өтініштер саны 17% — ға артқанын атап өтті.
— Мәселелердің көбісін тегін медициналық көмектің кепілдік берілген көлемі және міндетті әлеуметтік медициналық сақтандыру пакеттері шеңберінде медициналық көмек көрсету тәртібін, жоспарлы және шұғыл стационарлық медициналық көмек көрсету ережелерін, сақтандыру мәртебесін беру және т.б. мәселелерді сауатты түрде түсіндіріп сол жерде шешуге болатын еді, — деді Лариса Гордеева.
Өтініштердің үштен бір бөлігі медициналық көмектің сапасына байланысты. Көбінесе солтүстікқазақстандықтар емханаларда мамандардың консультациялары мен учаскелік қызметті қабылдауды ұзақ күту мерзіміне, медициналық ұйымға хабарласу мүмкін еместігіне, медициналық этика мен деонтологияның бұзылуына, мобильді бригада қызметтерінің қолжетімсіздігі мен сапасына шағымданады. Амбулаториялық деңгейде дәрі-дәрмекпен қамтамасыз етуден бас тартуға байланысты шағымдар да бар. Жалпы Петропавл емханаларының жұмысына қатысты шағымдар саны жылына үш есе өскен.
— Өтініштердің сипатына сүйене отырып, кадр тапшылығының өткір мәселесі анықталды. Медициналық кадрларды кәсіби даярлаудың жеткіліксіз деңгейі, әсіресе ауылдық жерлерде өзекті болып табылады. Сонымен қатар, дәрігерлер мен орта медициналық персоналды заманауи медициналық жабдықта жұмыс істеу дағдыларына ие болу мәселелері де туындап отыр, — деді Лариса Гордеева.
