Бұл шараны осыдан 30 жылдан астам уақыт бұрын «Дене шынықтыру және әскери тәрбие теориясы мен әдістемесі» кафедрасының профессоры Виктор Тулаев қолға алған болатын, деп хабарлайды Qyzyljarnews.kz тілшісі.
Бұл іс-шараға университеттің 5 студенттік құрамасы, сондай-ақ облыстық олимпиадалық резервтегі мамандандырылған мектеп-интернат-колледжінің оқушылары қатысты. Көркем гимнастика, акробатика, облыстық «Street Workout» бойынша құрама және басқа да спорт шеберлеріне үміткерлер қойылым көрсетті.
Гимнастикалық жарысқа қатысушылар қолдаудың көмегімен күрделі пирамидалар тұрғызды, кедергілер жолағын еңсерді, эстафетада жарысты. Балалар жақсы нәтиже көрсетті.
Шараның қорытындысында үшінші орынға ФКС-20 тобының 3 курс студенттері тұрақтады. Екінші орынды екінші курс студенттерінен жасақталған құрама алды. Облыстық олимпиадалық резервтегі мамандандырылған мектеп-интернат-колледжінің оқушылары бас бәйгені қанжығасына байлады. Тұғырдағы жаттығуларда барлық жүлделі орынды университет студенттері Рустам Алпысов, Игорь Клюк, Василий Луговых және Ерлан Умаров иеленді. Ал ат үстінде өнер көрсетуден ФКС-21 тобының студенті Аман Рахметов жеңімпаз атанды.
