Биылғы жыл төтенше жағдаймен басталды. Қаңтардың 1-і күні өртте екі адам қаза тапты. Олардың бірі төсекте темекі шегудің кесірінен, екіншісі пешті қыздыру кезінде бензинді қолданғанның салдарынан көз жұмды, деп хабарлайды тілші Qyzyljarnews.kz СҚО ТЖД баспасөз қызметіне сілтеме жасап.
СҚО ТЖД бастығының орынбасары, азаматтық қорғау полковнигі Дмитрий Растихиннің айтуынша, Жаңа жыл мерекесі кезінде облыс аумағында сегіз өрт оқиғасы тіркелді.
– Қаңтардың 1-і күні Қызылжар ауданының орталығы — Бескөл ауылында жеке тұрғын үйде өрт шығып, оқиға орнынан 1977 жылы туған ер адамның мәйіті табылды. Болжам бойынша, ер адам төсекте темекі тартып ұйықтап қалған, — деді Дмитрий Растихин.
Сол күні кешке сағат 20.00 шамасында Петропавлда Жұмысшы кентінде жеке тұрғын үйде өрт болып, 1989 жылы туған ер адам қаза тапты.
– Куәгерлердің айтуынша, ер адам досымен бірге пешті жағу үшін бензин қолданған. Нәтижесінде бір адам аман қалды, ал екіншісі қайтыс болды. Болжам бойынша, екеуі де мас болған, — деді Дмитрий Растихин.
Жалпы өткен жылы облыста 695 өрт оқиғасы тіркеліп, тілсіз жау 38 адамның өмірін қиса, 30 түрлі дәрежедегі дене жарақатын алды.
