Ұлттық қауіпсіздік комитеті еліміздің өңірлерінде ірі көлемде көкнәр шикізатын сату қылмысына қатысы бар топтарды анықтады. Олардың бірі – Петропавлда есірткі саудасымен айналысқаны белгілі болды, деп хабарлайды Qyzyljarnews.kz тілшісі.
Жедел зерделеу жұмысының нәтижесінде Петропавл қаласында есірткі қылмысына қатысты топтың көмекшілері ұсталып, 5,5 тоннаға жуық аталған апиын түрі алынды. Осы операцияның екінші кезеңі барысында Өскемен қаласында 1 тонна көкнәр шикізатын алу үстінде есірткі курьері ұсталды. Дәл осы уақытта, Қарағанды қаласында жалға алған қоймаларда 10 тоннадан аса есірткі шикізатын сақтап келген есірткі қылмысына қатысты топтың ұйымдастырушылары ұсталды. Бұған қоса тінту шаралары барысында есірткі қылмысына қатысты топ қатысушыларынан жарақаттаушы және суық қару, сонымен қатар ірі көлемде ақшалай заттар табылып, алынды.
Алдын ала тергеу анықтағандай, аталған апиын тамақ өнімдері түрінде шетелден Қазақстан аумағына кіргізіліп, есірткіге тәуелді ортада саудаланған. Жалпы қолға түскен есірткі көлемі 16 тоннадан асты. Одан әрі жедел-тергеу амалдары жүргізілуде. Бүгінгі таңда есірткі бизнесіне қарсы күрес жұмысы жалғасуда.
Фото: Қазақстан Республикасы ҰҚК баспасөз қызметі
