Айыртау ауданында қарлы боран салдарынан екі ауыр жүк көлігінің жүргізушілері қар құрсауында қалып қойды, деп хабарлайды Qyzyljarnews.kz тілшісі.
Қаңтардың 8-і күні жергілікті маңыздағы Елецкое мен Айыртау ауылдары арасындағы автожолда «SHANTUI» бульдозері тиелген «МАЗ» автокөлігі жол жиегінен шығып кеткен. Ауыр жүк көлігінің жүргізушісі Марат Жамбылов тез арада «102» телефон нөміріне қоңырау шалып полицейлерге оқыс оқиға жайлы хабарлады. Көмекке келген учаскелік инспектор Шоқан Асқаров пен әкімшілік полиция қызметкері Асқар Мақперов жергілікті «Баянтай» ЖШС-не жүгінген. Серіктестік иесі болған жайтқа бейжай қарамай «К-700» тракторын көмекке жіберді.
– Қатты боран көлігімді лезде қардың астында қалдырды. Аудандық полиция бөлімінің бастығына және оның қарамағындағы қызметкерлерге жедел көмек көрсеткені үшін алғысымды айтамын. Қызметкерлер бізді қардан шығарып қана қоймай, жақын маңдағы жанармай құю стансасына дейін жеткізді, — дейді Марат Жамбылов.
Бұдан бір күн бұрын Лобаново мен Имантау ауылдарының арасында «Scania» фурасы қалың қарда қалып қойған. Түркия елінен Ғабит Мүсірепов атындағы ауданға жасымық тиеп алып кету үшін келгенін атап өткен жөн. Бұл жүк көлігі де жол жиегінен шығып кеткен. Учаскелік полицейлер Нұрлан Кәріпенов пен Ербол Қасқатаев бекітілген учаскені патрульдеу кезінде қар құрсауында қалып қойған жүк көлігін байқап жақын жердегі «Ключи» ЖШС өкілдерінен көмек сұраған еді.
Фото: ашық дереккөздерден
