Наурыздың 9-ы мен 25-і аралығында «Қазгидромет» РМК СҚО бойынша филиалының гидрологтары өңірдегі гидробекеттер желісін жоспарлы бақылау шараларын ұйымдастыруда. Негізгі мақсат — гидробекеттерді бір сарынға түсіру, деп хабарлайды Qyzyljarnews.kz тілшісі.
Нысандардың жұмысын бір қалыпқа келтіру — су деңгейін бақылау жүргізілетін өлшегіш құрылғылардың жұмысын анықтау үшін жасалады.
Аталған іс-шаралар нысандардың жай-күйі, су тасқыны кезіндегі нақты деректерді алуға мүмкіндік береді. Сондай-ақ су тасқынына байланысты гидробекеттердің қызметкерлерін оқыту жоспарланған. Бұған қоса тексерілген өлшеу құралдары орнатылады. Бұл ақпараттардың нақты болуына септеседі, дейді мамандар.
Жалпы өңірде барлығы 19 гидробекет бар. Оның екеуі — Сергеев және Петропавл су қоймасында орналасқан. Біреуі — Үлкен Тораңғұл көлінде, ал 16-сы — Есіл өзенінің бойында орнатылған.
