Петропавл полицейлері саяжайда мылтық ұстап келе жатқан ер адамды ұстады, деп хабарлайды Qyzyljarnews.kz тілшісі.
Қалалық полиция басқармасының мәліметінше, патрульдік полиция батальонының қызметкерлері саяжай қауымдастығының аумағын аралау кезінде екі ер адамды байқап қалған. Күдікті әрекеттермен көзге түскен жігіттер полицейлерді көре сала қалың қарға белгісіз затты тастап, бой тасалаған. Тәртіп сақшылары қалың қардан бір ұңғылы «ИЖ-К» аңшы мылтығы мен 16-калибрлі 5 патрон салынған қара пакет тауып алды. Кейін полицейлер анықтағандай, 30 жастағы қала тұрғыны мылтықты бұталардың арасынан тауып алған екен.
– Қаруды заңсыз қолдану үшін заңмен көзделген жауапкершіліктен құтылудың жалғыз мүмкіндігі — тіркелмеген қару-жарақты өз еркімен тапсыру. Қару сияқты басқа да қауіпті заттарды анықтаған жағдайда, олардың табылғаны туралы дереу полицияға хабарлау қажет, – дейді СҚО ПД әкімшілік полиция басқармасының бастығы Серік Әлжанов.
Өткен жылы заңсыз айналымнан 128 бірлік тіркелмеген қару тәркіленді.
Фото: СҚО ПД баспасөз қызметі
