Петропавлдық музыкант Давид Литвинов Cannes Shorts Француз байқауында «Үздік композитор» номинациясының тізіміне енді, деп хабарлайды Qyzyljarnews.kz тілшісі.
Кандағы байқаудың қазылар алқасын таңғалдырған музыканы Давид «Victoria» фильміне жазған. Бұл фильмді петропавлдық режиссер Александр Шингуров түсірген. Төрт минуттық фильм АҚШ-тың Қазақстандағы дипломатиялық миссиясы ұйымдастырған «48 hour Film Race» Орта Азия байқауы үшін арнайы түсірілген. Конкурстың шарттары бойынша қысқа метражды фильмді екі күнде түсіру керек болған. Фильмге әуен жазған композитор Давид Литвиновтың айтуынша, туындыда терең ой жатыр.
– Фильм Виктория есімді қыз жайлы емес. Виктория сөзі латын тілінен аударғанда “Жеңіс” деген мағынаны білдіреді. Яғни, бұл фильмнің идеясы – надандықты, ашкөзділікті жеңу, -дейді композитор Давид Литвинов.
Талантты жерлестеріміздің бұл туындысы «Үздік драма» атағына ие болды. Фильмнің режиссері Александр Шингуров бұл байқаумен тоқтап қалмай туындыны басқа да сайыстарға жіберген. Нәтижесінде Давид Литвинов «Cannes Shorts» фестивалінде «Үздік композитор» атанды. Оның фильмге арналып шығарылған өлеңі канндық қазылар алқасының көңілінен шыққан.
– Қос байқауда да номинацияға ие болу үш ұйықтасақ түсімізге кірген жоқ. Дегенмен, жетістігімізді біліп, кеудемізді мақтаныш сезімі кернеді. Бір өкініштісі Францияға барып марапаттау рәсіміне қатыса алмадық. Алда әлі де осындай биік шыңдарды бағындырамыз деген үміттемін, — дейді композитор Давид Литвинов.
Давид Литвинов Н.Погодин атындағы облыстық орыс драма театрында музыкалық бөлімінің меңгерушісі болып қызмет атқаратынын айта кеткен жөн. 2012 жылдан бері ол театр қойылымдарына арнап өлең жазады. Оған қоса ресейлік театрлармен жұмыс істейді
