Өңірде үш күн ішінде көші-қон заңнамасын бұзудың 30 фактісі анықталды, деп хабарлайды Qyzyljarnews.kz тілшісі.
Солтүстік Қазақстан облысы полиция департаментінің көші-қон қызметі басқармасында «Шетелдік» акциясы қорытындыланды. Негізгі мақсаты – құқықтық тәртіпті сақтау, заңсыз көші-қонның алдын алу және жолын кесу, сондай-ақ шетелдіктер мен азаматтығы жоқ адамдар тарапынан Қазақстан Республикасында болу тәртібінің ережелерін бұзғандарды анықтау.
«Шетелдік» акциясының бірінші күнінде қалалық полиция басқармасының көші-қон полициясы бөлімінің қызметкерлері Петропавл сауда үйлерінің бірінде құрылысшы болып жұмыс істеген, бірақ еңбек қызметімен айналысуға рұқсаты жоқ 4 шетелдікті ұстады. Олардың барлығы – Өзбекстан Республикасының азаматтары екені анықталды. Нәтижесінде аталған құқық бұзушылық үшін шетелдіктер Қазақстан Республикасы ӘҚБтК-нің 517-бабының 5-бөлігі (Шетелдіктің немесе азаматтығы жоқ адамның ҚР халықтың көші-қоны саласындағы заңнамасын бұзуы) бойынша әкімшілік жауапкершілікке тартылды.
СҚО ПД көші-қон қызметі басқармасының бастығы Талғат Әбіловтың айтуынша, акция қорытындысы бойынша шетелдік азаматтардың болу ережелерін бұзудың 30 фактісі анықталып, барлығы 30 шетелдік әкімшілік жауапкершілікке тартылды.
Фото: СҚО ПД баспасөз қызметі
