Бүгін Петропавлдың Заречный шағынауданындағы жеке үйде өрт шыққаны туралы хабар түсті, деп хабарлайды Qyzyljarnews.kz тілшісі.
Облыстық төтенше жағдайлар жөніндегі департамент баспасөз қызметінің хабарлауынша, оқиға орнына келген өрт сөндірушілер бірден қызыл жалынды ауыздықтауға кірісті. От баспананың іргесіндегі қора-қопсыны да жалмаған. Тілсіз жауды сөндіруге 8 техника мен өрт сөндіру қызметінің 25 маманы жұмылдырылды.
Өрт салдарынан бір қора түгелімен жанып кетті. Ал үй мен жанындағы екінші шаруашылық нысанындағы от дер кезінде сөндірілді.
— Өртті сөндіру үйлер мен қосалқы ғимараттардың тығыз орналасуынан қиынға соққанын айта кеткен жөн. Қызыл жалын шарпыған аумақ 120 шаршы метрді құрады. Зардап шеккендер жоқ. Жанып жатқан үйден 8 газ баллоны шығарылды. Оттың шығу себебі анықталуда, – делінген СҚО ТЖД-ның баспасөз қызметі.
Видео: СҚО ТЖД баспасөз қызметі
