Петропавл қаласы полиция басқармасының бастығы лауазымына Ербол Тайбеков тағайындалды, – деп хабарлайды Qyzyljarnews.kz тілшісі Polisia.kz сайтына сілтеме жасап.
Солтүстік Қазақстан облысында Петропавл қаласы полиция басқармасының жаңа бастығы тағайындалды. Бұл лауазымға Ербол Тайбековтің кандидатурасы лайық деп танылды.
— Ербол Тайбеков 51 жаста. Жамбыл облысының тумасы. Ішкі істер органдарында қызметін 1993 жылы кәмелетке толмағандар істері жөніндегі инспектор қызметінен бастады. Ол әр түрлі лауазымдарда, соның ішінде басшылық қызметте, елдің әртүрлі аймақтарында жұмыс істеді, – деді СҚО ПД бастығы Айдан Қабдулдинов.
Облыстық ведомствоның бастығы Ербол Тайбековті полиция аппаратының басшысы ретінде таныстырып, қалалық басқарманың жаңа жетекшісіне жедел-қызметтік қызметін ұйымдастыруда табыс тіледі. Бұған дейін қалалық полиция ведомствосын басқарған Жандос Мұқатов қаңтар айында Ұлытау облыстық полиция департаменті бастығының орынбасары болып тағайындалғанын атап өткен жөн.
