Жыл басталғалы облыста 62 өрт оқиғасы тіркелді. Қызыл жалын 8 адамның өмірін қиып, 3 тұрғын түрлі дене жарақатын алған, деп хабарлайды Qyzyljarnews.kz тілшісі.
Облыстық төтенше жағдайлар жөніндегі департаментте өткен брифингте белгілі болғандай, өрт шықпай-ақ көміртегі тотығымен уланудан 18 адам жарақат алып, 1 адам қаза тапты. Ақпан айында соңғы оқыс оқиғалардың бірі Айыртау ауданында орын алды.
– Ақпанның 8-і күні Айыртау ауданының Карсаковка селосында жеке тұрғын үйде өрт болды. Тілсіз жау тұрғын үймен жанында тұрған қора-қопсыны толығымен жандырып жіберді. Оқиға орнында 1957 жылы туған үй иесі термиялық күйікпен аудандық ауруханаға жатқызылды. Өкінішке қарай, ол ақпанның 11-і күні көз жұмды, – деді СҚО ТЖД мемлекеттік өртті бақылау басқармасының бастығы Аслан Ахметжанов.
Ақпанның 14-нен бастап облыста өрт қауіпсіздігі айлығы басталды. Оның аясында департамент қызметкерлері 17462 тұрғын үйді аралап шығып, нәтижесінде 46 мыңнан астам азамат қамтылды. Оларға 28 мыңнан астам жадынама таратылды. Сондай-ақ өңірдің 69 елді мекенінде 1800-ден астам адам қатысқан жиындар өтті.
