Облыстық кәсіпкерлік және индустриялық-инновациялық даму басқармасы басшысының міндетін атқарушы Дархан Әміриннің сөзінше, биыл заманауи екі сауда нысанының құрылысы жалғасады, деп хабарлайды Qyzyljarnews.kz тілшісі.
– Жалпы ауданы 10 мың шаршы метрден асатын сауда нысанын «Фирма Леонтьев» жауапкершілігі шектеулі серіктестігі тұрғызады. Ойын-сауық орталығын салуға 2,5 млрд. қарастырылған. Ал ауданы 5 мың шаршы метрді құрайтын «Мұқанов» ЖШС «Aurora» іскерлік орталығын ашпақшы. Оған 1,2 млрд. теңге жұмсалады, – деді Дархан Әмірин.
Облыстық әкімдікте белгілі болғандай, 2022 жылы өңірде 2 сауда нысаны пайдалануға берілді. Оның бірі Тайынша қаласында орналасқан. Инвестиция сомасы 80 млн. теңгені құрайды. Ал екіншісі – «Семей» супермаркеті. Оны тұрғызуға 185 млн. теңге бөлінді.
