Солтүстік Қазақстан облысының әкімі Айдарбек Сапаров мектептерді мамандандырылған күзетпен қамтамасыз ету үшін конкурстарды жедел өткізуді тапсырды, деп хабарлайды Qyzyljarnews.kz тілшісі.
Аймақ басшысының баспасөз қызметінің мәліметінше, аппараттық кеңесте Айдарбек Сапаров Петропавлдағы №4 мектепте болған оқиғадан кейін бірқатар тапсырмалар берген.
— Аудан әкімдеріне мектеп директорларымен кеңес өткізуді тапсырамын. Барлық сұрақтарды қатаң бақылауда ұстау керек. Мектептерді мамандандырылған күзетпен қамтамасыз ету қажет. Барлық конкурстарды жедел өткізіңіздер, — деді облыс әкімі.
Оқу-ағарту министрлігінде өткен шұғыл кеңесте облыс әкімінің бірінші орынбасары Марат Тасмағанбетов шабуыл жағдайларының қайталануын болдырмау үшін барлық кешенді іс-шаралар өткізуге уәде берді. Министр Ғани Бейсембаев болса, мектептерге кіретін адамдарға бақылауды күшейтуді тапсырды. Өңірде құрылған жұмыс тобы қазір білім беру нысандарында қауіпсіздік құралдарының бар-жоғын тексеруде. Бүгінгі таңда облыстың 23 мектебінде мамандандырылған күзет қызметтері бар, ережелер бойынша тағы 27-де қажет екенін айта еткен жөн.
