Петропавлда ауыл шаруашылығы өнімдері саудаланған жәрмеңке өтті. Ұлыстың ұлы күні қарсаңында ұйымдастырылған сауда-саттық «Наурыз жәрмеңкесі» деген атауға ие болды, деп хабарлайды Qyzyljarnews.kz тілшісі.
Жәрмеңкеге облыс аудандарынан әкелінген азық-түлік өнімдері саудаланды. Сондай-ақ сатуға қалалық кәсіпкерлер де тауарларын ұсынды. Олар азық-түліктің 85-тен астам түрін саудалады. Оның ішінде ет және шұжық өнімдері, сүт және сүт өнімдері, ұн мен жарма, бал, жұмыртқа және балық.
Жәрмеңкеге облыс әкімі Айдарбек Сапаров та қатысып, ұсынылған өнімдердің бағасымен танысты. Сөрелерге қойылған тауардың бағасы дүкендегіден 15-20 пайызға арзан болды.
Тұрғындар жұмыртқалардың бір ондығы 400 теңгеден (супермаркетте – 500-520 теңге), жылқы етінің бір килограмы 2 700 теңгеден, пиязды – 150 теңгеден, картопты – 100 теңгеден сатып алуға мүмкіндік туды. Шошқа еті орташа есеппен бір килограмына 1 750 теңгеден, сиыр еті – 1 800 теңгеден, қой еті – 2 100 теңгеден сатылды.
