Облыста жүк тиелген «КамАЗ» көлігі жол жиегінен шығып қалды. Қиын жағдайға тап болған жүргізушіге көмекке полицейлер келді, деп хабарлайды Qyzyljarnews.kz тілшісі.
«Мамлютка – Қостанай» тас жолында «КамАЗ» жүргізушісіне қалың мұз кедергі келтірді. Салдарынан тіркемесі бар жүк көлігі Дубровный ауылының маңында жолдан шығып кетті.
Жүк көлігінің жүргізушісі «112» нөміріне хабарласып, көмек сұраған. Құтқарушылар жедел әрекет ету мақсатында бұл жағдай туралы полицяға жеткізді. Нәтижесінде оқиға орнына жақын маңда болған патрульдік полиция батальонының қызметкерлері Әміржан Таккужин мен Азамат Қуанышев келіп жетті. «КамАЗ» көлігін шығару үшін үш бірлік ауыр техника тартылды.
– Жүргізушілерді жолда жүргенде өте сақ болуға шақырамыз. Ауа райының өзгеруі мұздың пайда болуына әкеледі. Бұл жағдайда көлікке уақытылы тоқтау қиын. Сондықтан жылдамдық режімін және көлік құралдары арасындағы қашықтықты сақтау қажет. Әсіресе елді мекендердің жанында аса қырағылық таныту қажет, — дейді СҚО ПД патрульдік полиция батальонының командирі Валихан Оразалин.
