Наурыз мейрамы қарсаңында ел көлемінде «Күй күмбірі» челленджі ұйымдастырылды. Өнер эстафетасына 14 мың солтүстікқазақстандық мұғалім мен оқушы қатысты, деп хабарлайды Qyzyljarnews.kz тілшісі.
Мереке қарсаңында Астана уақыты бойынша сағат 12:00-де ұйымдастырылған челленджден еліміз барлық мектептері қалыс қалмады. Бір уақытта Қазақстанның түкпір-түкпірінде домбыраның үні естіліп, халқымыздың ұлттық күйлері орындалды.
– Біздің облыстың мектеп оқушылары мен мұғалімдері челленджді қолдады. Ақжар ауданының «Серпер» өнер мектебінің домбырашылар ансамблі ұзақтығы 15 минутқа созылған эстафетада ұлттық күйлерімізді орындады. Құрманғазының «Балбырауын», «Сарыарқа», Әбдімомын Желдібаевтің «Ерке сылқым» күйлерін естіртті. Әр әуенде халқымыздың тарихы көрініс табады десек артық айтпағандық. Акция отансүйгіштікке тәрбиелейді. Бұдан былай бұл челлендж дәстүрге айналатынына сенімдімін, – дейді облыстық білім басқармасының жетекшісі Нәзір Жәшібеков.
Домбыра челленджі республикада алғаш рет өткізілгенін атап өткен жөн.
