Жыл басынан бері облыста қызыл жалын 10 адамның өмірін қиды. Сондай-ақ 3 өңір тұрғыны түрлі дене жарақатын алды, деп хабарлайды Qyzyljarnews.kz тілшісі.
Жалпы соңғы үш айдың ішінде облыс аумағында 108 өрт оқиғасы тіркелді. Бұл көрсеткіш өткен жылмен салыстырғанда 16 пайызға аз болғанымен, қызыл жалын салдарынан көз жұмғандар қатары едәуір көп. Осы тақырып төтенше жағдайлар жөніндегі департаментте ұйымдастырылған брифингте қозғалды.
СҚО ТЖД бастығының орынбасары Дмитрий Растихиннің сөзінше, өрт оқиғаларының басым бөлігі жеке тұрғын үй секторында орын алды. Ол жалпы төтенше жағдайлардың 76 пайызын құрап отыр.
– Ауа райының күрт жылынуымен даладағы құрғақ шөптер де жануы мүмкін. Кішкентай ғана темекі тұқылынан қайғылы оқиғалар орын алуы ықтимал. Өткен жылдың өзінде саяжай қауымдастығына тиесілі учаскелер өртке оранды. Салдарынан 200-ден астам шағын үй өртеніп, 85-сі толығымен жанып кетті, – деді Дмитрий Растихин.
