СҚО полицейлері үш күннің ішінде алимент төлеуден жалтарып жүрген 9 адамды тапты, деп хабарлайды Qyzyljarnews.kz тілшісі.
Алимент төлемейтіндер мен айыппұлдар бойынша борышкерлер өңір полицейлерінің ерекше назарында. Оларды іздестіру бойынша акцияны облыстық полиция департаментінің көші-қон қызметі бөлімшелерінің қызметкерлері өткізді.
Тайынша ауданының шалғай ауылдарының бірінде 3 жасар қызы алдындағы қарызын өтеуден қашып жүрген 27 жастағы солтүстікқазақстандықтың тұрғылықты жері анықталды. 27-29 наурыз аралығында аумақтық полиция бөлімшелерінің күштерін тарта отырып өткізілген акцияның 3 күнінде 9 алимент төлемейтін және алты борышкер анықталды.
– Іздестіру шаралары тұрақты негізде жүргізіледі. Қазіргі уақытта көші-қон қызметі бөлімшелерінің өндірісінде борышкерлер мен алимент төлемейтіндерге, сондай-ақ туыстық байланысын жоғалтқан адамдарға қатысты 60 іздестіру ісі бар. Оның 45-і елден тыс жерде, олар мемлекетаралық іздеуде деп жарияланды. Бұл бағыттағы жұмыс облыстық полиция департаменті басшылығының тұрақты бақылауында, — деді СҚО ПД көші-қон қызметі басқармасының бастығы Талғат Әбілов.
