Облыста алты мыңнан астам адам өмір сүріп жатқан 85 елді мекеннің су астында қалу қаупі жоғары, деп хабарлайды Qyzyljarnews.kz тілшісі.
Облыс әкімі аппаратының жұмылдыру даярлығы және азаматтық қорғаныс бөлімі басшысының орынбасары Берік Ғабдулиннің айтуынша, су тасқынын алдын алу мақсатында жергілікті атқарушы биліктің 1 485 адамынан және 1183 техникамен қамтамасыз етілген арнайы топтар құрылған. Сонымен қатар қауіпсіз жерге көшірілгендерді қабылдайтын 257 пункт, 109 жүзу құрылғылары, 15,5 мың тонна инертті материал даярланған.
– Жер үйде тұратын әр адам маңайын қардан тазалауы тиіс. Қыс бойы қарды үйдің маңына үйе бермей, оны сыртқа шығарып, алдын алу жұмыстарын жасауы керек. Үйінің жанындағы арықтарға қоқыс төкпей, оны тазалап отыру маңызды. Бірақ тұрғындардың көбісі осы қарапайым шаруаларды істемейді. Соның салдарынан көктемде қарғын судан зардап шегеді, — деді облыстық төтенше жағдайлар департаментінің бөлім басшысы Сәкен Ағзамов.
