Облыстағы дүкендердің бірінде алкогольді заңсыз сатқан азамат анықталды. Сауда орнынан 37 литр ащы су тәркіленді, деп хабарлайды Qyzyljarnews.kz тілшісі.
Мамлют ауданында полицейлер алкоголь өнімдерін заңсыз сатудың тағы бір фактісін анықтады. Дүкен иесі сыра мен коньяк саудалаған. Белгілі болғандай, кәсіпкерде оны сатуға лицензиясы болмаған. Құқық бұзушылықты «Қауіпсіз аула» акциясы аясында аудандық полиция бөлімінің учаскелік инспекторлары анықтады.
Әкімшілік құқық бұзушылық туралы кодекстің 463-бабы бойынша материал жиналып, іс сотқа жіберілді.
– Алкоголь сатуға қатысты заңнаманы бұзу отбасылық зорлық-зомбылық, бұзақылық және ұрлық, басқа да қоғамдық тәртіпті бұзу фактілеріне ықпал етеді. Себебі олардың көпшілігі мас күйде жасалады. Алкогольді заңсыз сатуға қарсы іс-қимыл – полиция қызметкерлері тұрақты негізде жүргізетін жоспарлы профилактикалық жұмыстың маңызды құрамдас бөлігі. Жыл басынан бері ауданда 278 литр заңсыз алкоголь тәркіленді, – дейді Мамлют аудандық ПБ бастығы Петр Климов.
Облыс бойынша қаңтар айынан бастап, учаскелік инспекторлар заңсыз сатылған 2667 литр құрамында спирті бар өнімді тәркіледі. Заңсыз кәсіпкерлікен айналысқан 83 құқық бұзушы жауапқа тартылды.
