М.Қозыбаев атындағы Солтүстік Қазақстан университетінде ғылым күніне орай «Жастар және ғылым – 2023» атты халықаралық конференция өтті, деп хабарлайды Qyzyljarnews.kz тілшісі.
Конференицяда түрлі салада ізденіп, зерттеу жүргізіп жүрген ғалымдар қатысып, жетістіктерімен бөлісті. Шараны жоғары оқу орнының инновациялар және интернационалдандыру мәселелері жөніндегі басқарма мүшесі Дамель Мектепбаева ашты.
– Ғалымдардың қатысуымен өтетін мұндай шаралар ғылым жолын таңдаған студенттер үшін аса маңызды. Бұл конференцияға жас ғалымдар алғаш рет қатысып отыр. Ғылым саласына алғашқы қадамдар осындай шараларға қатысудан басталады. Өткен жыл жоғары оқу орнының ғылым қызметкерлері үшін табысты болды. Биылғы жылдан да үмітіміз зор, – деді Дамель Мектепбаева.
Жиын пленарлық отырыспен жалғасып, жас ғалымдар баяндамалар жасады. Олар «Академиялық ұтқырлықтың болашақ педагогтардың тұлғалық-кәсіби қалыптасуына әсері», «Балалар аспаптық орындауындағы қазақ фольклоры» сынды тақырыптарға жазылған зерттеу еңбектерін жұртшылыққа ұсынды.
