Жыл басынан бері КСРО паспортымен жүрген 7 солтүстікқазақстандық тұрғынға жаңа жеке куәлік берілді, деп хабарлайды Qyzyljarnews.kz тілшісі.
Қазақстан азаматының жеке басын куәландыратын құжаттар республикада 1994 жылы енгізілді. 1974 жылғы үлгідегі паспорты бар адамдар бірқатар қызметтерді ала алмайды, төлемдерді рәсімдеуде түрлі кедергілерге тап болады. Дегенмен, бірқатар тұрғындар қандай да бір себептермен ескі төлқұжаттармен өмір сүріп келеді.
СҚО ПД көші-қон қызметінің қызметкерлері оларға құжат беру жұмыстарын жалғастыруда. Петропавл қаласының 49 жастағы тұрғыны құжаттарды рәсімдеуге көмек сұраған. Көші-қон полицейлері азаматтығын анықтау рәсімін жүргізді.
– Қала тұрғыны үшін жеке куәлік дайындалды, енді ол біздің мемлекетіміздің барлық қызметтерін пайдалана алады. Ескі құжаттарды пайдаланатын солтүстікқазақстандықтарды мәселені шешуді кейінге қалдырмауға және өздерінің құқықтық мәртебесін реттеуге шақырамыз, – дейді СҚО ПД көші-қон қызметі басқармасының бастығы Талғат Әбілов.
Жыл басынан бері көші-қон қызметінің қызметкерлері СҚО-ның жеті тұрғынына ҚР азаматтарының куәлігін алуға көмектесті.
